A construción do Arsenal Militar en 1750 marcou un antes e un despois para Ferrol, pois acabou por definir tamén un modelo de cidade ilustrada inédito ata o momento no estado. Ao abeiro deste pioneiro complexo foi necesario deseñar unha nova poboación, unha cidade concibida de maneira planificada e integral, froito de amplo e pensado proxecto construtivo que foi máis alá do puramente arquitectónico pois serviu como porta de entrada dos preceptos clasicistas, tanto na vida pública como na  linguaxe artística e construtiva de Galicia.

Neste percorrido achegarémonos ao Ferrol ilustrado do século XVIII a través de 25 arquitecturas singulares que foron testemuñas directas dos primeiros tempos da Cidade Departamental. Deste xeito poderemos coñecer as vivendas clasicistas do barrio da Magdalena; as construcións do considerado primeiro barrio obreiro de Galicia, situado en Esteiro; edificios relixiosos; hospitais; así como infraestruturas militares e de obra civil.