O porto de Ferrol, debido á especial configuración da ría e da súa orografía, é dos máis seguros do mundo. Xa a finais do século XVI, Felipe II decidiu que a ría de Ferrol fose utilizada como base para a Armada Real. No s. XVIII, Ferrol foi designada capital do Departamento Marítimo do Norte e Felipe V ordenou a creación do Real Arsenal e dun Estaleiro na aldea da Graña. Máis tarde, Fernando V ordenou a construción dun gran estaleiro na vila de Ferrol, dedicado case exclusivamente á construción de barcos para a Armada. Nace así o Porto Ideal da Ilustración, denominación coa que Ferrol aspira ao seu recoñecemento como Patrimonio Mundial.
FERROL DA ILUSTRACIÓN
Arsenal Militar
Declarado Ben de Interese Cultural, a súa construción data de mediados do s. XVIII, durante os reinados de Fernado V e Carlos III. Contén edificios e construcións de gran valor, como a “Porta do Dique”.
Baluarte de San Xoan
Este baluarte ou batería asómase desde Ferrol Vello ofrecendo unha magnífica vista sobre o porto de Curuxeiras, coa Cortina do Arsenal polo lado leste, un muro defensivo con multitude de canóns.
Castelo de San Felipe
Magnífico exemplo de arquitectura militar, levántase moi preto da zona máis angosta da Ría de Ferrol. Fronte a el, na beira oposta da Ría, a pouco máis dun centenar de metros, atópase o Castelo da Palma
Cuartel de Dolores
Declarado Ben de Interese Cultural, ten a honra de ser o cuartel máis antigo de España. A súa construción comezou en 1751 e desde 1771 acolle as tropas de infantaría de Mariña española.
Museo da Construción Naval
É probablemente o principal museo dedicado á historia da construción naval que existe no mundo.
Museo Naval
Edificio deseñado no s. XVIII por Sánchez Bort, sitúase xunto ao edificio de Herrerías e cumpriu no pasado a función de presidio. Hoxe en día trasládanos aos momentos máis gloriosos da Armada Española a través dos séculos.
Navantia
O actual estaleiro de Navantia é herdeiro dunhas instalacións e dunha bagaxe de 300 anos. Navantia é referente mundial no deseño e construción de buques militares equipados coa última tecnoloxía.
Palacio de Capitanía
Monumental edificio que acolleu no pasado a Capitanía Xeral da Zona Marítima do Cantábrico. O seu exterior austero, esconde un interior suntuoso con grandes salóns alfombrados.
Barrio da Magdalena
A pesar do seu nome pode dicirse que é o centro de Ferrol, xa que aquí se atopa o Concello e os principais comercios así como unha gran cantidade de locais de hostalaría. Semipeonil, foi declarado Conxunto Histórico-Artístico en 1983.
Patrimonio da Humanidade
Ferrol presentou no 2018 a candidatura “Cidade de Ferrol: Porto da Ilustración” á Xunta de Galicia, para o seu posterior traslado ao Ministerio de Cultura.
Síguenos
