É unha visita moi recomendable tanto polas vistas estupendas da súa localización, no Cabo Prioriño, na entrada da ría de Ferrol, como polo contido do Centro, que informa ao visitante da orixe e evolución das baterías defensivas da ría e tamén dunha gran obra construtiva dos nosos días, como é o porto exterior.

No contorno atópanse o Faro Prioriño e un observatorio ornitolóxico, punto de observación de aves migratorias.

As Baterías de Punta Viñas e de Prioriño Chico, ambas as do s. XVIII, foron rehabilitadas e postas en valor. A primeira consta dun pequeno cuartel, a polvoreira e a estancia denominada “bala vermella”, o lugar onde se quentaban as balas antes de ser disparadas.